Monseigneur, il et non sans cause, jay donné charge

à monsieur le chanoyne mon frère et à ma femme vous

presenter une requeste attachée aux lectres patantes

dexemption de ne loger à ma maison aulcungs gens de

guerre, soit de pied que à cheval, obtenues par moy de

monseigneur le prince daulphin d’Auvergne lieutenant general

pour le roy en Daulphiné, par bon advis et justes causes à ce

mouvans le conseil du roy et de mondit monseigneur le prince

vous treuveres que vous, monseigneur, y avés adheré ; et

dhabundant pour hoster toute scrupule sont esté interinées

au parlement du Daulphiné, comme verrés par pièces

joinctes (plus à plain) à ladite requeste. Vous supplie humblement

ycelles patantes et le contenu en icelles me estre observées

de poinct en poinct, et appoincté par vous suyvant les

fins de ma requeste. Car aultrement nestant pourveu

par votre seigneurie, ne pourrey fallir de tomber en quelque

inconvenient tant es personnes de moy, de ma famille,

et partie des deniers du roy, de mes biens, sans ce que je suys

destourné de ma charge, à la quelle je suys assés

empeché et faché, pour treuver par tous moyens argent

pour satisfaire au roy sans pouvoir recepvoir comme

les depputés du clergé en peuvent testiffier. Ce

faysant me ferés justice, me randant à tousjours

obligé de plus en plus à vous faire service très humble

daussi bon cueur comme très affectueusement me recommandant

à vous bonnes graces, prye Dieu,

monseigneur, vous donner en santé très heureuse et

longue vie. De Grenoble, ce XVe mars 1574

Le tout votre très humble et affectionné

serviteur Jehan Gournyer, recepveur

Consultation